文字換錢｜薛可正
最近香港百業荒廢，連帶細佬我終日喺屋企游手好閒。呢幾年掛住忙其他範疇，做導演、做編劇、開公司、做餐廳，到宜家市道咁差，成日都要諗仲有咩可以增加收入，突然諗到，「文字」係咪仲未可以搵錢。
用「仲未可以」呢個諗法，好明顯，我本來就唔相信喺香港寫字可以搵錢。
七年前出版我人生第一本書「男人唔可以窮」，感激大家支持，我認為係天時地利之下，最後總共出咗八版，實際賣咗幾多本我就唔太清楚，但過萬銷量就點都一定有。
香港出書，第一版多數係1500本，大約要賣到700至1000先可以回本〈視乎你本書嘅質素同用料〉，一般朋友可以賣完第一版，再版嗰時已經要開香檳慶祝，唔係覺得好威，而係喺香港呢個「付費文字沙漠」入面，有1500位朋友真心真意去支持你，呢支香檳同我買貴少少，真係要慶祝一番。
當年挾住高登入面嘅反應，加埋上過Yahoo熱搜，書局採購向我哋一開就想拎4000本嘅數量，不過我同當時出版社老闆Chris都無咁大信心，所以第一版好似只係印咗2000本，最後一出即時賣清。
賣清之後好快又第二版，跟住一直落去，出到第八版，由2013年3月一直去到2013年書展，男人唔可以窮一同男人唔可以窮二，最後總銷量應該接近兩萬。更加喺2013年年尾，電影版男人唔可以窮正式開拍，呢個成績今日睇返，我自己認為難以複製，但最後我可以喺呢兩本書所收到嘅錢，大約有16萬〈書稅〉。
電影版權比較複雜，因為我當時係兩本書一齊賣，最後第二集拍唔到，我亦收唔到第二集嘅版權錢；而第一集收到嘅錢，我亦要同當時幫我傾嘅朋友去收，所得到嘅錢，因為合約問題唔能夠講實數，只可以講比書稅少。
當然有人話，我可以喺入面拎到名氣，對我做其他行業都方便，但我想探討嘅只係，除咗我之外，仲有好多想用文字做事業嘅創作人，我可以肯定講句，佢哋行嘅路都比我一定更加難。
呢個收入，除開一年嘅時間，每個月就萬幾兩萬蚊，一個「難以複製」嘅事件每個月只可以換嚟萬幾二萬蚊嘅收入，之後點算？
喺現有嘅體制下，用文字出書搵唔到錢已係事實，因為發行同書局扣走嘅比率實在太多，近年有朋友自資出版，由書到設計、出版、運輸一腳踢，聽說收入不錯，但極度辛苦。
而最重要係，自資出版有幾個條件，你本身要係一個多功能嘅人，你識設計，你就可以慳返一樣成本；你識校對，你嘅成本就可以更加低，直到你集所有技能於一身，再每個星期寫三四個小故事放網上俾讀書免費收睇，保持名氣同時要身兼幾職，最後喺含有風險下自資出書，先可以搵到一個正常可以養家活兒嘅收入，呢一種「文字換錢」，咬出嚟唔止血汗，仲有腦漿。
大陸有「起點」呢種平台，真正可以做到賣字維生，只要一位作者每日努力幾個鐘，將一啲小娛樂帶到大家眼中，可以滋潤大眾生活中三數十分鐘，佢就可以透過呢啲平台得到穩定又正常嘅生活。只有呢一種養份，一個創作嘅人先有時間吸收唔同嘅靈感，再創作出唔同嘅好故事供大家娛樂。
養隻牛耕田都要俾佢休息，為生計而過住疲勞生活嘅文字創作者，任你係一個天才，都可能有一日要意興闌珊咁返到現實打份寫字樓工安渡餘生。
文字換錢，生命何價？
￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭￭
IG：Sithoching
Search